POLISI YAWASHIKILIA WALIOPORWA MAMILIONI YA FEDHA NA MAJAMBAZI

JESHI la Polisi linawashikilia wafanyakazi wa Kiwanda cha Mtava kutokana na kudaiwa kula njama na kuhusika na uporaji wa sh milioni 5.9 uliotokea katika barabara ya Shaurimoyo na Nyerere jijini Dar es Salaam.

Akizungumza nasi, Kamanda wa Polisi Mkoa wa Kipolisi Ilala, Kamishna Msaidizi Mwandamizi (SACP), Mary Nzuki, alisema wafanyakazi hao wanashikiliwa kutokana na tukio la uporaji lilitokokea katika barabara ya Shaurimoyo juzi saa 10 jioni.

Kamanda Nzuki, alisema kuwa Tutu Mtabalezi (32), na Cletus Mathew ‘Lilungulu’ (46), wakiwa katika gari namba T875 AZU Toyota Mark II maeneo ya Shaurimoyo, walivamiwa na mtu mmoja aliyekuwa katika pikipiki aina ya Boxer na kufanikiwa kupora kiasi hicho cha fedha na kutokomea kusikojulikana.

“Mathew ambaye ni Meneja Utawala na Mtabalezi Meneja Msaidizi walikuwa wakitokea kuchukua fedha za mauzo za kampuni hiyo maeneo ya Msimbazi, ndipo walipofika Shaurimoyo katika foleni wakavamiwa na watu hao waliokuwa katika pikipiki na kuporwa,” alisema.

Alisema kuwa, hadi sasa Jeshi la Polisi linaendelea kuchunguza tukio hilo huku likiwashikilia wafanyakazi hao.