Mbowe: CCM ni Mbugi

KIONGOZI wa Kambi ya Upinzani Bungeni, Freeman Mbowe, amekifananisha Chama Cha Mapinduzi (CCM) na mchezo wa ‘Mbugi’.

Wakati Mbowe akiwaita CCM Mbugi, Mwenyekiti wa Chama cha Wananchi (CUF), Profesa Ibrahim Lipumba aliwaita CCM Intarahamwe.

Kwa mujibu wa Mbowe, Mbugi ni mchezo wa soka usio na sheria, wala refa.

Alisema kwenye mchezo wa Mbugi hakuna idadi kamili ya wachezaji, kila mchezaji akiingia anachezea timu anayotaka, katikati ya mchezo anaweza kubadilisha timu na kuchezea timu nyingine.

Akizungumza na waandishi wa habari wakati akitangaza Baraza jipya la Mawaziri Kivuli lenye ya wajumbe wa UKAWA, Mbowe alisema wanachosema na kufanya CCM kwa sasa ni sawa na Mbugi, kwani hawana kanuni na kila mtu anaweza kusema anachotaka.

Alisema hivi karibuni kumekuwa na kauli na misimamo tofauti kuhusu UKAWA zinazotolewa na viongozi mbalimbali wa chama hicho.

Akitolea mfano alisema hivi karibuni Kamati Kuu ya CCM ambayo Waziri Mkuu, Mizengo Pinda ni mjumbe, wamepitisha azimio la kutoshughulika na UKAWA kwani wameamua kutoka kwenye Bunge Maalumu la Katiba.

“Pinda huyo huyo akihitimisha hotuba yake, anawasihii UKAWA kurudi bungeni. Juzi Waziri wa Ofisi ya Rais (Mahusiano), anasema UKAWA walitoka bila sababu, watarudi bila sababu, lakini ukimsikiliza Nape Nnauye na Katibu Mkuu wake, Abdulrahman Kinana wanasema UKAWA wasibembelezwe, waachwe wabaki nje ya Bunge. Hii ni Mbugi.

“Kinana kaja kavua shati kaingia kwenye Mbugi, Nape naye Mbugi, Wassira katoa shati kaingia kwenye mchezo Mbugi, hawana kanuni, sheria. CCM ni Mbugi,” alisisitiza Mbowe.