MUHUDUMU WA HOTELI AFARIKI GHAFLA AKIPELEKWA KUTIBIWA

MUHUDUMU wa hoteli ya Hunters jijini Dar es Salaam Rose Mfuje (26) amefariki dunia ghafla baada ya kupata maumivu ya tumbo.

Kamanda wa Polisi Mkoa wa Ilala, Marietha Minangi alikiri kupokea taarifa za kifo hicho kilichotokea juzi saa 7 usiku maeneo ya Kigamboni jijini humo.

Alisema Rose aliugua akiwa katika hafla ya kumuaga mmiliki wa hoteli hiyo ndipo alipopelekwa kituo cha afya Kigamboni lakini alifariki wakati akipewa matibabu.

Wakati huo huo, nyumba iliyopo Bwaloni Mbezi kwa Msuguri jijini hapa mali ya Deatus Mtei imeteketea kwa moto.

Kamanda wa Polisi Mkoa wa Kinondoni, Camillius Wambura alisema moto huo uliteketeza vyumba 10 kati ya 17 ulitokea juzi saa 7 mchana baada ya kuzuka kwa moto nyumbani hapo.

Alisema chanzo cha moto huo hakijafahamika na upelelezi unaendelea.