CUF hawaitaki Serikali ya Mapinduzi’

WAZIRI wa Nchi Ofisi ya Rais, Mahusiano na Uratibu, Stephen Wassira amesema viongozi wa Chama cha Wananchi (CUF) hawayatambui Mapinduzi ya Zanzibar ya mwaka 1964.

 Pia, amesema baadhi ya wajumbe wake, wanapinga Siku ya Mapinduzi, kutambuliwa katika kalenda za kitaifa nchini kote.

Wassira alisema hayo katika mkutano wa hadhara, uliofanyika katika Uwanja wa Kibandamaiti mjini Zanzibar.

Alisema chama hicho hakina dhamira na nia nzuri kwa Wazanzibari katika Mapinduzi ya Januari mwaka 1964.

Akifafanua, alisema alipambana na viongozi wa CUF wakati wakijadili Katiba katika Bunge Maalumu la Katiba na kuwaeleza umuhimu wa Mapinduzi ya Zanzibar, ambayo ndiyo yaliyowakomboa wananchi wa Zanzibar kutoka katika makucha ya wakoloni.

Kwa mfano, Wassira alimtaja mmoja wa wajumbe waliokuwemo katika kamati yake, ambayo yeye alikuwa kiongozi kuwa ni Ismail Jussa, ambaye alikuwa akipinga na kutaka siku ya Mapinduzi, isitambuliwe na kufanywa kuwa siku ya mapumziko kitaifa.

Alisema Jussa anataka siku za sherehe za kitaifa, ikiwemo Mapinduzi ya Januari 1964 na Uhuru wa Tanganyika, ziondolewe na zisitambuliwe kama siku za kitaifa rasmi.

“Hawa watu ni wa ajabu sana kumbe hawayatambui Mapinduzi ya Zanzibar ya mwaka 1964, kwani hata katika kamati za Bunge Maalumu la Katiba nilipambana nao kikamilifu huku wakitaka Siku ya Mapinduzi ya Zanzibar ya Januari 12 mwaka 1964 isitambuliwe rasmi,” alisema.

Wassira alisema serikali zote mbili, tayari zimeanza kuzipatia ufumbuzi kero mbalimbali za Muungano, ambazo zimekuwa zikilalamikiwa na wananchi wa Zanzibar.

Hata hivyo, alisema kitendo cha wajumbe wa Bunge Maalumu la Katiba, wakiongozwa na wapinzani kutoka nje ya vikao, kwa kiasi kikubwa kutaathiri na kuzipatia ufumbuzi kero za Muungano.

“Nasikitishwa sana na kitendo cha wapinzani kutoka nje ya vikao vya Bunge Maalumu la Katiba, kwa sababu kutapelekea kero za Muungano zinazoihusu Zanzibar kushindwa kupatiwa ufumbuzi wake,” alisema.