Kigwangala atafakari kujitosa urais 2015!!!

                            Dk. Hamis Kigwangala,

MBUNGE wa Nzega mkoani Tabora, Dk. Hamis Kigwangala, amesema anatafakari kama ataweza kugombea urais kwenye uchaguzi mkuu ujao kupitia Chama Cha Mapinduzi (CCM).

Akijibu maswali ya waandishi wa habari waliotaka kujua fununu zilizoenea kwenye baadhi ya mitandao ya jamii na kuibua mijadala inayomshawishi kugombea urais mwaka 2015, Dk. Kigwangala alisema anatafakari jambo hilo zito na muda utakapofika atazingatia maoni ya wananchi.

Alisema haoni hatari kwake kutangaza mapema kwamba atagombea urais ni kujipunguzia sifa ndani ya chama chake, huku akisisitiza kwamba hajatangaza kama anataka urais wala hajamtuma mtu kumfanyia kampeni.

“Watanzania wanaongozwa na katiba yenye uhuru wa kujieleza na kutoa maoni, na hayo ni mawazo yao… wanayo haki ya kufanya hivyo, siwezi kuwapinga,” alisema Dk. Kigwangala ambaye pia ni Mwenyekiti wa Kamati ya Bunge inayoshughulikia Tawala za Mikoa na Serikali za Mitaa (Tamisemi).

Hivi karibuni uliibuka mjadala kwenye mitandao ya kijamii na baadhi ya wanaharakati kutengeneza vuguvugu la kumshawishi Dk. Kigwangala achukue fomu ya kugombea urais ifikapo mwaka 2015.

Mjadala huo ulianzishwa kwenye mtandao na kupewa jina la ‘Citizens for Kigwangala’ ambapo wanammwagia sifa mbunge huyo kwamba ndie kiongozi anayefaa kuwakilisha CCM katika uchaguzi mkuu.